O pasado sábado día 10 de marzo, con motivo do cuarto aniversario do Observatorio de andaina feminista pola Mariña e enmarcado tamén no Día Internacional das Mulleres, tivo lugar na Escola de Rinlo unha homenaxe ás mariscadoras de Rinlo. Estamos acostumadas a que as homenaxes, moitas veces, sexan a persoas xa recoñecidas socialmente ou a grandes nomes, e dende o Observatorio da Mariña pola Igualdade parecíanos moi importante recoñecer a labor e o traballo de persoas que son fundamentais para as comunidades nas que viven, para as súas veciñas e veciños, para a súa familia e para o seu entorno. O colectivo de mariscadoras de Rinlo pareceunos o exemplo perfecto diso xa que co seu traballo, duro e constante, fixeron posible o desenvolvemento de Rinlo a nivel social e económico, e foron e son un píar fundamental para as súas familias. Afeitas como estamos a que as mulleres do mar só sexan noticia ou se fale do risco do seu traballo cando hai unha desgraza, dende o Observatorio pareceunos de xustiza valorar, dende os nosos humildes medios, a historia e o traballo de todas estas mulleres para mostrarlles o noso cariño e a nosa admiración.
No acto, que tivo lugar ás 18.00h e no que se encheu a Escola de Rinlo, interviron Adela Figueroa, escritora que lles adicou o poema “A armada da Ribeira“ ás mariscadoras; Celsa Sánchez, ilustradora que agasallou ás mariscadoras cunha das súas obras da que podedes ver a foto aquí; e Pilocha, que pechou o acto adicándolles ás mulleres mariscadoras uns temas.
A ARMADA DA RIBEIRA
Amanha quando cantes na ribeira
Como adoitas facer nas alvoradas
Pressentirei na tua alma atormentada
O brincar do lume na lareira
Porque as chamas ardentes vao aquecendo
Os coraçoes das mulheres mergulhadas
Nas areias pretas, as pernas sempre molhadas
Na friagem dos lameiros de fétidos recendos
Multicolor exército de dobrado lombo
Na procura da vida agachada nas areias
Apresada nos “croques” como bombos
Darás gosto manha a paladares exigentes
Ignorantes e cegos de tantas pernas
E de pés amolecidos no salseiro das correntes
