“Dándolle a Volta” é un proxecto do Observatorio da Mariña pola Igualdade en colaboración coa Fundación Obra Social La Caixa que pretende abordar nos diferentes centros de ensino secundario da comarca as desigualdades existentes entre homes e mulleres na sociedade actual.
O obxectivo principal é favorecer e proporcionar un coñecemento crítico sobre os mecanismos de transmisión de roles e estereotipos na sociedade que nos leven a identificar as causas da violencia contra as mulleres, os modos nos que se dá e as posibles abordaxes para a prevención. Para iso, traballamos co alumnado presentándolle diverso material que dá lugar á reflexión e ao debate.
