Queredes coñecer un pouco mellor a Marie Curie, a primeira persoa en recibir dous premios Nobel e a primeira muller en ser profesora da Universidade de Paris? Si? Pois este xoves 11 de abril, ás 20.00h na Casa da Cultura de Burela, comeza o I Video-forum Rachando moldes. Mulleres que fixeron historia, coa proxección da película Madame Curie, de Mervyn LeRoy. A actividade é para todos os públicos, a entrada é gratuíta e convidámosvos a un café quentiño con pastas.
Madame Curie, unha película estadounidense dos anos 40′, conta a historia de cando a científica polaca María Sklodowska (1867-1934) casou con Pierre Curie e ambos traballaron xuntos en experimentos que lles permitiron illar dous novos elementos químicos: o polonio e o radio. Os dous foron galardoados co Premio Nobel de Física en 1903. Despois da morte de Pierre, Marie Curie proseguiu soa as súas investigacións e, ademais, foi a primeira muller que ocupou unha cátedra na Universidade de París. En 1911 recibiu o Premio Nobel de Química.
Agardámovos!
