Seguimos coa nosa campaña “Libre é a miña alma, e libre é o meu pensamento…” e lle adicamos o mes de febreiro a María Xosé Queizán, unha gran escritora que abarca múltiples xéneros na súa obra (narrativa, ensaio, poesía, infantil e xuvenil, teatro, guión cinematográfico, tradución…) e unha histórica do feminismo galego. Deixámosvos co fermoso texto e a foto que nos enviou para a nosa Axenda Feminista 2013 sobre Escritoras Galegas.
PENÉLOPE, “a que non se move”.
Penélope, a constante, tece tedio e fidelidade.
Agarda no fogar o regreso das naves de Ulises,
paradigma de aventuras e viaxes.
Astros e mares; terra e animais, a vida é movemento.
As penépoles privadas afánanse en labores sen valor.
Consumen a existencia coma se non fose súa.
Desde a súa caverna platónica enxergan fascinadas
o ímpeto dos homes libres, os logros, e artificios.
Elas, varadas, son naves desarboradas sen navegación.
Envoltas para regalo, calzadas co símbolo sexual,
atavíanse para a gadaña doméstica e trivial.
Penélope!, terma da onda, céibate da inercia, da morte!
María Xosé Queizán
